Humor

 Engkong Caim Story ( Part 1 )

Engkong Caim umurnye ude 90 taon, asmanye
kumat mulu, badan udeh tinggal tulang doang. Udeh
jalan 2 minggu, Engkong Caim diinpus di rumah sakit.
Napasnye udah tinggal senen kemis pake selang
Anak mantunye nungguin gantian siang malem.
Pas malem jum'at Engkong Caim ngedrop lagi,
pucet, badannye dingin, matenye sipit ame
napasnye tinggal atu dua.
Si Nasir, anaknye semate wayang, ngirain babenye
udeh waktunye koit. Ame si Nasir, dipanggil deh
ustad kampung situ namenye Ustad Bokir. Begitu liat
Engkong caim udeh diem aje, Bokir langsung
baca-bacain macem-macem doa. Eh tau-tau Engkong Caim
megap ame kejang-kejang, bikin panik orang.
Pak bahase isyarat, Engkong Caim tangannye niruin
orang nulis.
"Eh Nasir, Lu liat tuh tangan babe lu, daripade
bengong, kasih bolpen kek babe lu, kayaknye babe lu
pengen nulis surat wasiat tuh" katenye Bokir.
Nasir langsung ngibrit nyari kertas ame bolpen
buat babenye, kali aje dapet warisan tanah di Condet
kan lumayan.
Pake sisa tenaganye, Engkong Caim nulis dikertas
ampe' gemeter, abis gitu kertasnye dikasiin ke
Bokir. Ame Bokir, surat wasiatnye langsung
"Entar aje bacenye, kagak enak baca
surat wasiat sekarang, kan babe lu belon koit"
katenye Bokir ngebisikin Nasir.
Akhirnye Engkong Caim jadi koit dah. Inna Lillahi.
Orang sekampung pade nangisin, soalnye Engkong Caim
galak tapi baek ame tetangge.

Pas sukuran tujuh ari nye Engkong Caim, Bokir
diundang lagi ame Nasir buat ngebacain doa lagi.
Abis bacain doa, Bokir baru inget kalo die dititipin
surat wasiat ame almarhum Engkong Caim. Untungnye,
Bokir make baju taqwa nyang minggu kemaren dipake
waktu Engkong Caim koit, pas dirogoh, surat
wasiatnye masih ade dikantongnye.
"Sodare-sodare sekalian, ade surat wasiat
titipannye Engkong nyang belon sempet ane baca. Kalo
kite inget masa idupnye Engkong, kayaknye sih isinye
nasehat buat kite semue. Nyok kite baca
bareng-bareng suratnye ye" kate Bokir.
Begitu abis ngebuka lipetan surat wasiatnye,
tau-tau GUBRAKKK !!! Bokir ngejeblak jatoh pingsan.
Waktu dibaca ame Nasir, ternyate isi suratnye cuma
begini
"HEH Bokir !!!! Lu bedirinye sonoan dikit, jangan nginjek selang oksigen gua !!!!!"